【深夜食堂煮婦同樂會第17話】可樂餅 (附食譜)

上星期深夜食堂係八爪魚腸, 因為之前整拿波里意大利麵時已經整左, 所以休息左一個星期.

今個星期又做新上路交功課喇, 題目係第55夜的【可樂餅】. 初初見到個題目,  就問點解用可樂整餅架? 17號都係咁問我幾次.  到我整緊餅是, 佢又問我, 點解冇可樂?

其實可樂餅係源自法國的一款食物【Croquette】.  係用魚肉, 豬肉碎, 菜碎等整嘅炸肉餅來的. 據說係16世紀傳到日本, 到19世紀時比較普遍, 但因為當時日本人都唔係有錢, 就將薯仔加入肉碎同洋蔥碎整成炸肉餅.  既飽肚又好食.  養活了不少日本人.

其實我覺得整可樂餅跟漢堡係好似, 不過就漢堡貴價啲啦.

今次我整嘅係加左芝士入去嘅爆芝可樂餅. 啱晒我呢個芝士怪人. 

材料:
日本男爵薯仔    5個
椰菜                    1個
洋蔥                    半個
豬絞肉                $10
雞蛋                    1隻
麵粉                    適量
麵包粉                適量

做法:

1. 首先將薯仔烚至淋身 (其實用蒸嘅方法好啲, 不過唔夠時間, 蒸會冇烚咁濕身, 對之後做型同炸時比較乾身挺身)

2. 當烚薯仔時, 我就將豬肉放入KM碎肉機內碎好.  而家我都係自己碎肉, 乾淨啲, 食得安心啲.

3. 加油燒熱鍋, 加洋蔥炒至稍軟.


4. 加入豬絞肉與洋蔥一起炒熟, 盛起備用.

5. 薯仔用义壓爛.


6. 加入豬肉同洋蔥拌勻.


7. 拌勻後平均分5份, 搓成圓型狀.


8. 將3塊芝士疊起, 切5份正方形.  放於薯仔泥上,  再將薯仔泥完全包住芝士片成薯仔餅.


9. 將薯仔泥餅先撲上麵粉, 再沾上蛋液, 再撲上麵包粉.  鍋內加油燒熱至160度, 放入薯仔餅炸至兩面金黃色.  大約2-3分鐘. 即成.

呢個可樂餅因為用薯仔整.  所以食一兩個已經好飽.  不過加左芝士又真係好好食.

其他煮友作品: