應承左成年有多了都未實現, 不過上星期終於都請左朋友上我家食飯, 一行13人, 硬著頭皮煮煮煮, 煮左10個餸, 煮到人都癲, 搞到周身痛左成個星期先可以復元.
不過好開心, 因為朋友都喜歡我煮的餸. 好有滿足感, 仲話快o的再有下次. 不過真係有O的辛苦
要回下氣先得.而家終於有精神寫下食譜. 不過當日太趕, 好多餸都冇影相. 所以要遲下先post食譜. 不過因為整唔晒啲豬手, 所以尋日可以再整一次. 整俾爸爸媽媽試下.
其實我好少食豬手, 不過我發覺呢個整法好好食, 我都食左少少, 朋友們就好鍾意. 清晒1隻半豬手添.
夏天太熱冇胃口食野, 呢個酸酸甜甜, 好開胃呢.
材料:
豬手 1隻
甜話梅王 12-16粒
乾蔥 6粒
蒜頭 3粒
薑片 8-10片
山楂片 1湯匙
八角 2粒
油 2湯匙
白醋 1茶匙
調味:
老抽 1湯匙
蠔油 2湯匙
紹酒 2湯匙
鎮江醋 1湯匙
水 2-21/4
做法:
1. 山楂片先浸水, 待軟身彼去核. 話梅先用調味中的1杯水份量浸
2. 預備一煲水, 加入少許薑蔥及白醋, 待水滾後加入豬手先滾5mins, 隔水攤涼後用刀仔將豬手皮表面污穢物清除.
3. 先於鍋內加入2湯匙油, 燒熱後加入薑, 蒜, 乾蔥爆香.
4. 然後加入豬手兜炒一會.
5. 加入調味, 話梅, 山楂片, 八角入(4)內. 之後加水至蓋過豬手便可. 我連埋浸話梅水總共用左2 1/2 杯水, 因為用LC水份會KEEP得好, 所以唔需要落太多水.
6. 蓋上鍋蓋後用中大火煮滾, 待滾後繼續用中大火煮10mins, 然後轉水火煮25mins, 關火後焗15mins即可. (用LC可將煮的時間縮短, 待關火後用鍋內餘溫繼續焗)
呢個豬手比我上次整嘅更入味, 因為朋友上次話唔夠酸味, 我又嫌唔太上色, 所以今我加左山楂片同埋鎮江醋去吊起佢嘅酸味. 果然入味好多.
如果想入味啲, 可以等豬手涼左之後再加熱忟15-30mins, 豬手會好入味, 忟得越耐豬手就越淋, 唔想太淋就可以忟短啲時間.
沒有留言:
發佈留言