2011年5月9日星期一

桑寄生蓮子蛋茶

鍾意飲桑寄生蓮子蛋茶唔係好耐, 以前都唔覺得呢個糖水有乜咁特別, 不過就知道對女人身體特別好. 但我覺得碗o野好似好呃錢咁, 成廿幾蚊, 我就不如食合桃露啦! 不過有一次baba買外賣, 冇左我想食o既糖水, 我又想食熱o野下揀左佢, 一試就覺得好飲, 不過就比較稀o的, 而家變左我久唔久就想飲, 但係外面飲真係唔抵, 所以索性自己整! 原來唔係好難o乍!


材料: (4-5人份量)


桑寄生                    120g左右
蓮子 (已去芯)         40-50粒 (根據喜好隨意)
蛋                             4-5隻 (根據喜好隨意)
片糖                        適量 (我大約用左3條)
水                             2L

食譜: (冇煲湯魚袋做法)


1. 雞蛋烚熟, 放涼去殼備用. (可用籤於蛋上拮小洞以更入味)
2. 蓮子, 桑寄生分別洗乾淨, 瀝乾備用.
3. 將桑寄生及蓮子放入煲內, 大火加熱至水滾後轉慢火, 煲45分鐘.
4. 將桑寄生隔去, 加入雞蛋慢火再煲15分鐘.
5. 加入片糖調味便可.

用左我個Le Creuset flying heart petite casserole o黎裝起個糖水, 真係好正


我不嬲個肝麻麻地, 而呢個糖水可以補肝賢, 對我真係好有益, 以後可以多o的整o黎飲! 自己煲o既真係好香濃, 唔會好似街買返o黎咁好稀呢!


備註:

1. 桑寄生可於藥房買到, 一盒紅紅地色o既, 十幾廿蚊已經有一盒.

2. 我o既做法會將o的桑寄生用水浸一浸, 好似浸中藥咁, 等o的藥效出o的!

3. 呢個糖水仲可以因喜好加入杞子或者紅棗添.

16 則留言:

  1. 個碗好靚呀..
    你真係好有心機呀...

    回覆刪除
  2. 好似好補呀!!不過女人食有咩好呀??桑寄生邊度有得買?

    回覆刪除
  3. 原來呢個糖水咁好,等我煲俾老公同自己飲

    回覆刪除
  4. 我都係桑寄生蓮子蛋既fans啊!!!^0^
    "碗o野好似好呃錢咁, 成廿幾蚊"<<<<非常同意!!!
    hhah~~等我都試下自己整先!!

    回覆刪除
  5. 我都好鐘意飲架...去親西環源記都叫哩個來吃...好味又有益, 乜原來材料咁簡單?? 咁我都要自己試下先...平好多又方便啊...

    回覆刪除
  6. 以前學校d姐姐煲過我飲好好味,但我唔識煲,遲d我又跟你試下先! 我想問桑寄生係藥房有得賣?

    回覆刪除
  7. 我勁鐘意飲, 不過唔係好涼的嗎 ?

    回覆刪除
  8. 我知對想生仔, 安胎都好

    回覆刪除
  9. 我好鐘意隻碗呀

    回覆刪除
  10. 呢款好啱女士們.

    回覆刪除
  11. 我又要試下煲先, 因為我個肝都麻麻地呀!~

    回覆刪除
  12. CONFIRMED 5 月 21 日 (sat) 時間 : 19:30 地點 : 潮樓 - 香港九龍旺角太子道西 193 號. 新世紀廣場 7 樓 728-731 舖 book 左 13 人 ~ 李小姐 ~ (97721427) 因為人數較多 , 今次不主張帶埋男朋友出席 >.< 否則坐唔到一圍 ~~ 謝謝 ^^ 請留埋手提號碼給我 ~~ ^^

    回覆刪除
  13. 隻碗好靚呀!

    回覆刪除
  14. e個糖水真好有益, 我前2日先飲完!

    回覆刪除
  15. 請問..... 佢都算係中葯, 咁可唔可以用Staub/ LC黎煲呢? 定用Stainless Steel煲黎煲好d呢?

    回覆刪除