台灣紅豆婚紗之旅 - Day 6

今朝訓到9點幾就起身喇! 落左樓下拎佢免費提供o既早餐, 都係包包o黎o既, 不過都好好食o架!! 食完早餐之後舅父就o黎到, 我o地大件細件上晒車之後就出發係苗栗玩喇!

第一站就去左客家大院, 係一間傳統o既客家大屋, 內裡展覽左客家人o既生活文化, 日常工作用o既用具, 囍慶用o既物品等等! 大院出面有好大個花園, 種左好多花同埋都有水果!!!

係度都有介紹苗栗有乜好地方, 見到我去影pre-wedding o既神社呀!!!

行完客家大院之後我o地就出發去位於通宵鎮o既馬英九的老家 - 馬家莊.  都係係客家大院聽o的人講唔係好遠, 所以我o地就好即興咁去! 大約半個鐘左右我o地就到, 原來都幾偏僻o架! 不過就好寧靜好舒服, 而且沿路o既馬路就修得唔錯, 應該都係馬總統當選之後先修, 因為仲好新淨! 去到睇左幾間祖屋, 同馬仔個……紙牌影左張相.

之後就行去馬家莊遊客諮詢中心行下, 買左杯飛牛牧場o既香草雪糕食!!

坐左一陣我o地就出發去搵食, 舅母想帶我o地去上田咖啡屋食飯, 所以就開車去, 不過真係唔近o架, 去到飛牛牧場仲要上山行一段路, 經過好多農場先到達!! 不過環境就真係一流, 十級舒服又好relax…上田都有自己種咖啡豆o架, 不過我冇揀, 因為唔想飲酸o既咖啡, 所以要左blue mountain.



放飯喇!!!!  好好吃喔!!

嘆完一餐咁relax o既午餐之後, 我o地就開車返苗栗市, 落山時見到個婆婆, 問佢邊度返苗栗市最快, 佢講得好詳細, 我o地好快搵到條上返山o既路, 另一邊山就係三義…然後再返去苗栗市就真係好快! 返苗栗主要係shopping, 不過都冇乜時間買o野, 草草去左康是美掃埋最後2支Dr.Wu 101ml o既essence就走, 再去行下家樂福同金石堂, 睇下有冇o野買到….行完之後舅父就車我o地去食飯, 去左 一間叫 食小炒!

食完飯舅父就車我o地去機場, 因為颱風影響o既關係, 北上o既路都好大雨, 仲有少少塞, 好在最後都好順利到達機場, check-in完之後就四圍行下, 再入閘行下, 睇下hello kitty候機室…8:50pm我o地就上機返香港!!!

這個包包飛機餐就為我o地紅豆婚紗之旅劃上句號喇!!! 真係好唔捨得呀!!!

台灣紅豆婚紗之旅 - Day 5

尋晚影完相返到酒店都已經成11點幾, 食埋o野沖涼, 訓覺都已經成2點, 真係攰爆呀!!!

因為今日舅父想帶我o地去玩同埋去拜山, 所以8點幾就起左身, 係酒店cafe食左個簡單不過都ok唔錯o既自助早餐. 9點半左右就join左舅父車出去!

第一站就係去左兌錢, 因為下午要去挑片俾埋尾數! 去左國泰世華想兌錢, 排完隊佢竟然話只可以兌相等於USD1,000, 仲有唔收港幣$1,000大紙….叫我o地去返台灣銀行好o的!! 所以我o地又要去台銀…點知舅母話台灣o的銀行唔想做o既時候就係咁推人, 個個都叫人o地去返台銀...不過都好, 好在舅母之前係台銀做, 用返前員工身份同我o地兌個價高左少少.

兌完錢之後我o地去買左o的鮮花就去拜山!!  拜完山就直接去花海!! 估唔到Pre-wedding冇去影花海, 竟然第二日就去返!!

花海其實都好大呀, 不過而家得幾種花開, 好多都係波斯菊! 不過都已經好靚呀!!係花海入面有一個market, 有好多農作物, 植物, 仲有一個好多小食賣o既地方, 勁多檔仔同埋好多人食o野, 我o地當然唔執輸, 又買左好多o野食, 坐底慢慢嘆啦!

有烤菇, 炸菇, 菇菇羹, 台灣腸 (有一條係飛魚卵), 仲有蜂蜜茶葉燻蛋!

呢個芋蓉炸餅超好食呀!!!

食完o野之後就慢慢行返出去上車, 然後就返去台中, 一路去我好想去o既彩虹眷村呀!  因為睇相真係好靚, 所以今次點都要去探訪一下!

原來彩虹村都唔近台中市區, 比較近台中高鐵站o架! 眷村文化係台灣獨突o既文化, 不過台中眷村好出名就因為有一位老兵係眷村繪畫左好多圖畫, 而家吸引左好多人去參觀遊覽, 甚至去影結婚相!  我o地架車去到彩虹村時我已經好開心, 真係好colorful呀! 其實彩虹村地方好細o架o乍…不過平日都唔少人o黎參觀, 我o地四圍行下影下相, 已經好滿足喇!

去完彩虹村就返去紅豆桃片喇!

挑片詳情請看：紅豆婚紗之旅 - 揀相篇

食完飯之後, 舅父就車我o地返苗栗, 去左一間motel住 NT$1,200, 今次係第一次住MOTEL, 真係一間間獨立o既屋, 樓下係停車, 樓上係房!! 感覺好得意!

浸左個泡泡浴溫泉執埋行李就訓lu!!!

台灣紅豆婚紗之旅 - Day 3 - 4

今朝食完早餐, 早餐都好豐富o架, 係旅館俾o既cash coupon, 可以係溫泉街一間食肆當cash用, 唔夠就自己補錢!

食完好豐富o既早點又去左85C買左杯重LATTE飲.  嘆左一陣就行去搭返葛瑪蘭號巴士返台北!!  真係好快, 大約1個鐘左右就返到台北轉運站喇!!!

因為訂左12點o既火車票去苗栗, 所以就去左京站廣場行下Micia. 去到o既時候都仲未開門!

係Micia買左o的DIY用品, 就慢慢行返去台北火車站, 順便去買左便當上火車食, 去7-11買咖啡飲, 我飲左靜岡抹茶咖啡, 都唔錯喎!!!! 點解香港便利店冇o架!!

準時12:00上左自強號就出發去苗栗喇! 係車上就慢慢嘆個便當!! 其實個便當唔算太好食…不過不失啦!
下午1:41就到苗栗, 其實去苗栗係去join 17號舅父, 因為佢想帶我o地去佢新屋坐下然後就同我o地一齊出發去台中, 係舅父屋企坐左一陣就去左佢而家種菜o地方睇下… 以前返台中都有食佢自己種o既菜, 真係好好食o架…而家佢搬左o黎苗栗都有種…下次再o黎就可以食!!

離開菜田之後就上高速公路去台中喇! 因為約左5點鐘去紅豆溝通!  到左台中係中港路真係好塞車, 好多車排隊入新光三越!! 攪到勁塞車….好在最後都趕得切5點前去到紅豆o乍!

溝通詳情請看：  紅豆婚紗之旅 - 溝通篇

完成左溝通之後, 舅父就接左我o地同幾個阿姨一齊去中南海餐廳食飯, 正式宣佈我o地兩個下年結婚喇!!!

食完飯就返左去休息喇, 準備聽日影相相!!

Day 4

今日係拍攝日, 有關詳情請看:

紅豆婚紗之旅 - 拍攝日之造型篇

紅豆婚紗之旅 - 拍攝日之外景篇 (車站)

紅豆婚紗之旅 - 拍攝日之外景篇 (神社+海灘)

紅豆婚紗之旅 - 拍攝日之內景篇

台灣紅豆婚紗之旅 - Day 2

今日一早就起左身, 點知落雨!!!

Check-out之後就行返去溫泉街附近轉另一間旅館, 方便o的! 放底行李之後就行去火車站附近o既中山路搵食! 去左一間小店食我最愛o既炸醬麵做早餐.

食完早餐之後就去左85C買左杯海岩同埋捧子咖啡.

嘆左一陣就搭巴士去南方澳! 沿路發覺越來越大雨, 點知去到南方澳就冇停過雨, 行左個廟同埋以前o既造鐵廠.

之後就行去左食o野, 有A菜, 曼波魚面頰, 麵…

食完lunch之後我o地決定唔行去造船廠, 豆腐岬公園同埋內碑情人海灣, 只係上左的士係呢o的景點繞左個圈就直接去蘇澳冷泉, 蘇澳有全台灣唯一o既冷泉, 浸落去真係好凍, 不過好得意, 有好多泡泡會係o的毛孔度, 同埋浸左一陣就開始發覺自己o的關節位置有o的刺痛, 原來冷泉對治療關節痛好有幫助, 所以先會有反應!

浸完冷泉之後就去蘇澳火車站搭車返去礁溪. 返到礁溪就去左車站前又浸下腳, 之後就行去買諾貝爾奶凍, 中途見到有三星葱餡餅, 即時買o黎食, 三星盛產葱, 而家唔辣又香又甜…食落仲好爽….真係一流…從來都未如此鍾意食葱o架!!!

行左一段路就買左奶凍, 其實佢係好有名o既奶凍瑞士卷…. 特別之處係佢係瑞士卷中間有一條奶凍…真係好好食呀!!! 試左幾隻味之後決定買草莓奶凍..yummy!! 

買完o野就好輕鬆咁行返去溫泉街, 中途諗緊食乜o野晚餐好時見到有一間小店有紅糟肉同埋宜蘭好出名o既糕渣…..咁就要入去試下啦! 叫左紅糟肉, 糕渣, 蕃薯苗…紅糟肉真係超好食呀, o的肉都係紅紅地....而家我都好懷念呀!  而糕渣就好似蘿蔔糕咁, 不過冇咁硬同埋, 軟軟地滑滑地咁, 入口好熱o架...不過真係好得意呀!

(備註: 糕渣是以雞肉、豬肉和蝦仁剁成泥後，加入熬煮5~6小時的高湯拌煮成漿，倒 入盤中冷卻、凝固成形，再切塊、裹粉油炸而成)

食完之後再打包左鴨就返去溫泉街買手信…老金桔….真係好正o架!!  當地人用o黎泡茶用...就咁食都得...對喉嚨好好呢!

買完o野就返去旅館飲下啤酒食下鴨賞再浸過..

(備註: 鴨賞採用是以淘汰的產蛋鴨製成, 肉質比肥鴨更適合後製, 食起上o黎有咬口唔肥膩. 製作過程是將鴨去毛，除內臟後，以竹片撐開，塗上香料舖曬，再放入設有甘蔗渣和木炭的烤箱燻烤而成)

是日行程完畢.

台灣紅豆婚紗之旅 - Day 1

補返遊記呢一PART先!!!

今朝一早就爬起身喇, 搭5:30第一班車去機場. 真係超眼訓呀!

到左機場check-in就入閘行下, 再去買杯coffee先去閘口, 點知要delay半個鐘呀…唔知乜事, 可能架機有事啦, 之後竟然係轉左另一架機...

起飛已經成9:30, 真係一出門唔係好順利啦!!

食左個都唔錯o既包就到台北喇! 足足遲左成 45m ins左右! 我o地就拿拿聲上車出發去台北喇!!

第一站就去台北車站放底行李係locker….就後就沿地下街行去中山站, 去左 “福大蒸餃館” 食o野, 其實係台灣o的blog search返o黎, 當地人推介o既!

超好食o既蒸餃同山東大雲吞, 蒸餃出晒煙, 好足料又有肉汁!!!!  雲吞又係超大粒, 好足料! 台灣酸辣湯同香港唔同, 不過都唔錯!! 仲有我喜歡o既豆干!!

之後就行左去daiso同埋隔離金興發生活百貨店, 買左少少DIY o既stickers然後就去行去第一站 – 牧莎記事.  因為之前係網上面訂左貨, 而家係去拎貨, 順便寺朝拜一下啦! 其實牧莎南西門市都幾方便, 一出中山站行不到1分鐘就到! 上到去地方好似paperart咁大, 不過好多貨! 拎左貨之後又買左o的新o野咁就離開左牧莎!

跟住我o地就去左牧莎旁邊o的台灣牛乳大王買我好鍾意o既木瓜牛奶飲! 真係好好飲呀, 又足料又好飲!!! 正! 

飲完o野就搭的士去下一站 – 永樂市場, 只係NT75就到, 仲好快添! 去永樂市場係為左買布整BOOK CLOTH! 真係好多花布, 簡直瘋狂呀, 不過o的布唔係太平啦, 但係一場o黎到我都有o的收獲o既! 買左o的小花布...真係靚過係香港買啦!

買完花布之後我o地係附近行左一陣, 迪化街一帶真係好多DIY用品店, 手作人真係會行得好開心.

行完之後就搭的士返去台北車站, 拎返行李就去台北轉運站搭葛瑪蘭號巴士去礁溪喇!

行經雪山隧道, 大約個半鐘左右就到達礁溪, 真係好快, 好過搭火車! 到埗之後就去左福崗汽車旅館Check-in, 不過原來都要行一段路…. Check-in完之後就去左礁溪路o的小檔食晚飯, 有生魚片(鮭魚同池魚), 我最愛o既山蘇, 吊筒, 海鮮粥, o的小炒都唔錯呀!

仲有係隔離間鹵水店買左o的外賣, 真係超好食呀!!!

食完之後就去左7-11拎係網上面訂左o既書, 然後就行左一陣去買左支酒糟雪條食…好得意o架…有酒糟味道!! 正呀!!! 

食完雪條就行左去湯圍溝溫泉公園浸腳, o的溫泉水真係好熱呀, 公園又好多人好熱鬧…一路浸腳一路同當地人聊天…不亦樂乎!!

浸左一陣就返去旅館再浸全身喇! 爽!!!

紅豆婚紗之旅 - 溝通篇

各位, 我返o黎喇!!!!!!

今次去台灣有開心有唔開心啦, 因為有颱風影響o既關係, 我去宜蘭就有落雨, 影響左玩o既心情同行程...不過都有開心o既, 就係台中呢塊福地, 竟然係陽光普照, 真係得天獨厚呀!!! 所以今次紅豆之旅真係好開心, 好順利咁完成左!

講返行程, 旅遊o個part留返遊記先講.... 而家講溝通日先!

約左5點溝通, 17號舅父就好準時車我o地去到紅豆, 其實紅豆個位置都唔難搵, 去到見到門口o的凳就認得出!! 係佢喇!! 終於等到呢一日, 自己唔係睇相而係企係店前....真係好興奮!!!

入到門口就見到SASA, 欣怡, REX仲有一對客人, 仲有可可呀!!!

因為REX serve緊客人, 所以我o地就去左fitting先...fitting地方唔係紅豆店內, 佢o地而家租左個地方係行2mins左右就到, 係2樓!! 入到去地方都好大, 內景同化妝都係度! 都幾靚o架!! 感覺好舒服!

雖然唔係好似外面o的公司有好多衫, 不過其實o的衫都唔錯, EG特別多, 一定揀到, 而WG相對就少O的, 但我都揀到O的款試! 由美筠幫我試左十幾件之後, 我終於都揀到7件, 再係入面再揀5件....最後都定晒款.....好開心呀!!! 知道係影PW, 所以我揀左o的鋼紗款, 揀左件比較新o既黑色, 因為big day唔會揀o既!!

試衫o既地方, 又大又舒服!!!

揀好晒衫之後我o地就行返去店內, 跟住REX就同我o地溝通喇!! 佢問左我o地會去邊個景點再幫我o地諗下o的衫係邊度影比較好! 最後決定:

泰安車站 - 黑色EG
通宵神社, 樹林 - 白紗 + 綠色EG
通宵海灘 - 紅色EG
內景 - 白紗

決定左衫o既安排之後, REX就開始正式就住之前填寫o既溝通單同我傾攝影風格, 咁我今次主要都係想影o的比較有幸福感同埋warm o既相, 其他相都可以試少少, 我絕對唔要可愛feel! REX好details同我解釋溝通單內o的items係代表乜o野...跟住我就開左我部Netbook show晒我o的reference俾佢睇, 其實大部份o既相都係REX同MARS影o架....所以好多相REX都認得出!!

睇晒o的reference之後REX大概知道我想影o的乜.

有一樣好重要o既o野要問, 就係邊個係我造型師, 一問之下就知道係Amanda, 其實我冇指定, 我覺得Sasa同Amanda都好好, 不過因為Sasa話佢店內有好多o野要處理, 所以搵左Amanda幫手, 不過唔知點解我又好開心喎, 因為知道係淇淇啦, 之前係facebook已經add左佢, 所以特別有親切感呢!

咁就完成左第1日o既溝通日喇!

上左舅父車就去食飯喇!  好期待明天影相!!! 有少少緊張添!

題外話: 真係好搞笑, REX同我o地傾偈時經常講廣東話, 仲講得幾好添呀! 不過有o的位真係好好笑, 聽佢講廣東話真係好開心呀!

法式修甲 @ N for Nail

為左迎接去台灣影婚紗相, 奉獻左我o既第一次, 就係去修甲, 咁大個女都冇點油過指甲油o架!

一直都係喜歡簡單o既o野, 所以都係選擇法式...簡單但都好優雅! 效果又唔差!

今次去左monalisa 細妹介紹係重慶站o既 N for Nail做, 價錢唔貴.  o的師傅都好後生!! 揀左隻比較出o的o既閃粉紅做底色, 貪影相時會出o的!!

我仲修埋腳呀...效果都唔錯呀! 準備好靚靚出發去台灣lu!!!