【深夜食堂煮婦同樂會第44話】金平牛蒡 (附食譜)

我....我....我.....又偷懶啦......好耐冇交功課, 就快被踢出會

最近真係好忙, 唔係好多時間煮飯, 有時間煮飯時又想試下新菜式, 將深夜食堂忘記左......抵打.....  今次終於的起心肝整返一道....

金平牛蒡就係我再交功課之作.   牛蒡我一直好想試整, 不過太硬了, 唔知點整得好.  剛好深夜食堂有呢個課題...就試試吧!

話說「金平」係江戶時代的一個人物, 佢好強, 而牛蒡又係好強硬, 比較難去食, 所以大家就用左「金平」來形容牛蒡.

呢個金平牛蒡加左辣椒, 辣辣的非常醒胃,  平時係日本都有食呢道前菜, 而家自己都識整了, 好方便呢!

今次我選了Masa老師的食譜, 好味道呢!

材料:
牛蒡       2條
甘荀       1條
指天椒   1條
麻油       1/2 湯匙
油           1/2湯匙
白芝麻    少許

調味:
醬油       3湯匙
清酒       1湯匙
味醂       1湯匙
糖           1湯匙
水           2湯匙

做法:
1. 將牛蒡洗乾淨, 刨去外皮, 刨絲, 然後浸水.

2. 甘荀一樣刨去外皮, 刨絲.

3. 辣椒切圈或絲, 怕辣的先除去辣椒籽.

4. 先調好調味醬

5. 鍋內下油加熱, 放辣椒爆香.

6.先加入牛蒡絲以中火炒至稍為軟身.

7. 加入甘荀絲再炒一會.

8. 再加入調味料後用小火炒.

9. 待炒至收汁, 只餘少許汁時即可上碟.

本來我諗住晚飯時只吃一碟好似上面花花碟咁多的份量.  點知太好食, 我同hubby都食晒!!!