瑞士汁雞翼

上一回講到佛誕有house warming, 係17號o的死黨+中學老師, 所以我o地會親自下廚, 不過17號做主力, 而我只係負責一味, 就係我好鍾意食o既瑞士汁雞翼!

其實整呢個雞翼唔算好難, 最重要係個味道, 瑞士汁即是SWEET, 所以係比較甜, 調味o個時要掌握得好o的, 因為煮滾個汁試味, 同佢涼左o既味, 浸雞翼時個溫度o既味道會有o的分別, 通常涼左o既汁味道會甜返o的, 所以調味時要較得好, 到食o既時候個味道就唔會太咸或者太甜!

材料:
1. 雞中翼  25隻
2. 雞蛋      4隻 (隨意, 可以唔加)
3. 葱, 薑    少許
4. 冰          大量

瑞士汁材料:
1. 老抽      1支 (最愛鉅利醬油, 不過今次冇時間買, 所以用左金蘭)
2. 水          1支 (用返老抽個樽量1支份量)
3. 冰糖      1包
4. 玫瑰露  少許 (阿蘇會用紹酒, 不過我費事買, 用屋企現有o既玫瑰露)
5. 八角      少許 (今次用左6-7粒)
6. 雞粉      少許 (因為冇雞湯)

做法:
1. 先把葱, 薑及水加入煲內, 大火煲滚.
2. 將雞翼放入滚水內汆水, 等水再滾起時熄火.
3. 將雞翼立即放入冰水中急凍, 此舉令雞皮膨漲更滑更爽口.

4. 雞蛋烚熟放涼去殼. (可於雞蛋拮幾個洞, 會更入味)
5. 將老抽, 水, 八角, 玫瑰露, 雞粉加入煲內煮滾, 再加入冰糖煮至完全溶掉.  冰糖可自行隨意加多減少, 一路煮一路試味.

6. 待汁料煮滾後將雞翼, 雞蛋加入汁內, 雞翼表皮先向下放上色, 待汁再滾起後熄火焗10分鐘.
7. 10分鐘後再將雞翼及雞蛋反轉, 再焗10分鐘. 搞掂食得!

備註:  用完o既瑞士汁唔好倒, 可以留返雪入雪櫃, 之後拎出o黎再整都得o架!

今次用左LC 25cm OVAL整雞翼, 雖然煮汁時佢都有流馬尿, 不過焗雞翼好入味, 雞翼好滑, 今次係整得最滿意呀! 難得大家都話好食, 好快清晒所有雞翼同蛋, 好開心呀! 

母親節的Blueberry Cheesecake

而家有左個大焗爐, 真係好想日日都開工 

加上而家o的o野執得整齊左, 拎又方便, 唔駛好似以前咁搬o黎搬去, 所以好有動力去整o野食呢!

上星期日趁母親節, 就整左mama最鍾意食o既cheesecake俾佢, 佢好鍾意食焗o既chessecake, 特別係個餅底, 其實我覺得就咁整個餅底過佢食佢仲開心, 根本志不在個cake!!

一次過焗左兩個, 一個俾mama, 一個留返佛誕日house warming宴客!!

而家同一層可以放到一個6吋 + 一個7吋cake, 真係好好!

掛住上網, 唔記得夠鐘要拎佢出o黎, 因為個爐o的餘溫都好勁, 有少少啡左,
不過就唔係燶

加左o的blueberry醬又靚仔返! Mama好鍾意食!! hehe

自己都忍唔住要食返件

桑寄生蓮子蛋茶

鍾意飲桑寄生蓮子蛋茶唔係好耐, 以前都唔覺得呢個糖水有乜咁特別, 不過就知道對女人身體特別好. 但我覺得碗o野好似好呃錢咁, 成廿幾蚊, 我就不如食合桃露啦! 不過有一次baba買外賣, 冇左我想食o既糖水, 我又想食熱o野下揀左佢, 一試就覺得好飲, 不過就比較稀o的, 而家變左我久唔久就想飲, 但係外面飲真係唔抵, 所以索性自己整! 原來唔係好難o乍!

材料: (4-5人份量)

桑寄生                    120g左右
蓮子 (已去芯)         40-50粒 (根據喜好隨意)
蛋                             4-5隻 (根據喜好隨意)
片糖                        適量 (我大約用左3條)
水                             2L

食譜: (冇煲湯魚袋做法)

1. 雞蛋烚熟, 放涼去殼備用. (可用籤於蛋上拮小洞以更入味)
2. 蓮子, 桑寄生分別洗乾淨, 瀝乾備用.
3. 將桑寄生及蓮子放入煲內, 大火加熱至水滾後轉慢火, 煲45分鐘.
4. 將桑寄生隔去, 加入雞蛋慢火再煲15分鐘.
5. 加入片糖調味便可.

用左我個Le Creuset flying heart petite casserole o黎裝起個糖水, 真係好正

我不嬲個肝麻麻地, 而呢個糖水可以補肝賢, 對我真係好有益, 以後可以多o的整o黎飲! 自己煲o既真係好香濃, 唔會好似街買返o黎咁好稀呢!

備註:

1. 桑寄生可於藥房買到, 一盒紅紅地色o既, 十幾廿蚊已經有一盒.

2. 我o既做法會將o的桑寄生用水浸一浸, 好似浸中藥咁, 等o的藥效出o的!

3. 呢個糖水仲可以因喜好加入杞子或者紅棗添.

自家製梅酒

終於有左自己屋企, 發覺好多o野可以做, 有好多一直都想整o既o野而家終於可以整得, 因為本人同17號都好鍾意入廚, 所以有左個廚房之後就不停用佢, 唔俾佢休息.  今次整o的乜o野?? 

就係梅酒喇!

多謝blog友仔神仙o既無私奉獻及引誘, 今我燃點起整梅酒o既慾望

因為青梅一年只有3至5月左右先有得賣, 所以浸梅酒o既最佳時候就係春天喇, 如果早少少開工, 浸到中秋就有得飲, 一面賞月一面飲梅酒食月餅, 咪話唔爽

其實浸梅酒我係上個月中開始, 不過呢排個人真係懶左, 所以一直都冇blog, 而家補返先! 多謝神仙o既教路, 用左佢個formula, 梅:酒:糖o既比例係 2:2:1, 我浸5L.

開工lu!

首先就係洗乾淨o的青梅

然後就用牙籤去左青梅o既蒂

因為o的青梅青bb,未熟, 為左加速佢o既成熟度, 快o的有香味, 所以就用左熱水燙佢1分鐘, 1分鐘就好喇, 太耐o的梅可能過份熟會爛

燙完之後我就用左冰用浸一浸o的梅, 過下冷河, 呢個時候o的梅已經有香味

之後就可以將o的梅攤晒係度吹乾佢

吹乾左o的梅幾靚, 仲好香添

然後我o地就用籤逐粒梅桔下佢o地, 等佢o地出味o的

之後就可以入樽, 然後就加冰糖, 再落酒

搞掂晒之後就用保鮮紙封口, 冚返個蓋就ok喇!

完呢樽唔好以為我就停左手, 真係浸開有條路.... 17號都忍唔住, 號抬左樽二鍋頭返o黎, 我再乖乖地再去買青梅, 今次o的梅仲靚o的, 只係$8磅, 平過之前買之餘, 老板娘仲俾我自己揀梅....

呢兩樽梅酒就係用左佢o地

今次我用左另一個方法, 原來自己好早之前已經好想整梅酒, 竟然係公司搵返我剪低左o既報紙, 係梅酒o既食譜喎....上面話如果一早落糖o的梅會皺皮唔好睇, 想o的梅粒粒好似choya梅酒o的梅咁圓碌碌, 就先唔會落糖, 浸佢3至5個月之後先拎出o黎落糖, 就會好靚仔...所以今次我就用呢個方法啦!

浸完呢樽之後拎返之前o個樽, o的梅真係皺晒皮, 好似人腦咁!

整完呢樽我真係收手喇, 因為第一次整唔好咁狼, 如果真係覺得好飲就下年再整, 而家期待6個月後開封!

Wedding Card for My Best friend Ken

尋日係我認識左成10年o既好友- Ken o既大日子, 由當初讀U時期大家一齊係政府部門做Part-time, 到之後成班朋友成為左好友, 咁多年感情都好好, 我好珍惜大家o既友誼.  咁 佢big day我一定整返張咭俾佢賀一賀佢啦. 

不過今次張咭只係一張摺咭, 冇特別花臣, 因為入面要整返個人情封, 加埋要留多o的位寫我o既心聲

好求其咁整左個人情封, 下次要整好o的先得!

 

成班朋友一講結婚, 大家原來有5pairs人都係一年內結, 所以今年真係好旺好開心呢..下一個就輪到我喇!!! hehe!

見家長

一直對見家長呢一環唔係太著緊, 同埋覺得遲少少都冇所謂啦, 因為唔想太早, 聽o的B2B講, 有時太早仲麻煩, 少o的見面好o的

不過阿媽成日都叫我約17號家人, 話咁遲冇禮貌呀!  原本諗住去試下菜, 不過試菜都好貴下呀, 諗諗下都係唔抵, 所以終於係勞動節翌日當日約左兩方家人出o黎飲茶!

17號家姐一早上左o黎新屋睇下, 之後就一齊去屋企附近商場間酒樓飲茶.  好在氣氛都ok, 大家閒話家常, 又講下我同17號o的o野, 講下我o地o的攪笑o野, 咁就過左個半鐘.  順順利利又過一關!

安樂晒!

Wedding Card for Asuki

最近真係好懶, 有左自己屋企之後拎願留係屋企hea, 真係hea, 都冇乜mood做o野! 所以好多blog要寫都冇寫到!!!

不過懶極都要蒲頭o架!! 好有幸獲Asuki邀請出席佢o既結婚儀式, 我一定要出席啦, 雖然我未見過佢, 之前好多gathering我都miss左, 不過同佢真係幾有緣, 緣自我o地都係好鍾意阿joe, 就係o個度互相認識左, 之後都一直互blog, 雖然冇見過, 但有一種好奇怪o既感覺, 好似好投緣咁!! 哈哈! Asuki唔好話我自作多情呀, 就算係, 你私人留言俾我好喇!! 好hurt o架!!

應承左Asuki, 所以我點懶都要開工整張咭過佢o既!! hehe!!

見好多blogger都鍾意整slider card, 今次我都要試下!  原來真係幾好玩o架!!! 簡簡單單整左張咭, 配合返Asuki有黑色theme color o既元素在內!

一拉就見到入面o既message!

不過中間有個小插曲, 我臨出門時再check下張咭, 點知痴實左, 拉唔到, 大力o的入面條膠條斷左可能係我痴得唔好!  所以即時再換過一條...好在有驚無險, 如果唔係Asuki一拉就爆, 好樣衰呢!!