薑汁撞奶 (附食譜)

上次整MUFFIN俾各位babies食時剩左一盒奶, 尋日到期所以又整左薑汁撞奶俾媽媽食!

因為媽媽好鍾意食...所以好耐之前就學識左整...而家久唔久阿媽就話要食!! 好在我仲教識細路整...有時佢會整!! 我唔駛刨薑刨得咁辛苦!!

未影相媽媽已經急不及待食左先! = ='

食譜

材料:
鮮奶  1盒  (我用維記高鈣低脂奶)
老薑  1大舊 (可取足夠1湯匙薑汁)
糖      1茶匙

造法:
1. 先將薑刨皮再磨薑變成蓉. 用"西"盛住, 用匙羹壓薑蓉取汁. 需要薑汁1湯匙.
2. 鮮奶倒入煲中, 用中慢火將奶加熱, 至少許冒煙, 煲的邊緣牛奶已開始有小氣泡凝聚, 但不是大氣泡及滾起的, 熄火.
3. 加糖入煲中, 不用攪拌.
4. 將已加熱的奶倒入另一個煲內, 此為1下, 再將另一煲內的奶倒回第一個煲內, 此為第2下...來回撞10下, 鮮奶便大約在70-85度左右.
5. 將熱奶撞入有薑汁之碗內.
6. 不要攪拌碗內的奶及不能移動碗. 靜止2-3分鐘至鮮奶凝結為止, 即可.

注意:
1. 薑汁可以視乎喜好多o的都得, 因為媽媽喜歡辣所以我會用1.5湯匙.
2. 兩個煲互相撞奶好似拉茶咁拉法但不要太高, 此為令空氣走入令奶降溫.
3. 熱鮮奶撞入碗前前需再攪拌一下薑汁...因為薑汁內的白色澱粉質會沉底...要將澱粉質攪勻, 成功就係靠呢o的白色o既澱粉質.
4. 撞入碗時在碗旁邊撞入, 效果會更理想.